*     *     *

Олон улсад танигдсан нэр хүнд, бүтээлийн чансаагаар өмнөх хоёроосоо дутахгүй өөр нэгэн найруулагч байдаг нь Ким Жэ-Вун юм. Түүний ихэнх сайн кинонууд мөн триллер, хоррор төрлөөр хийгдсэн байдаг. Миний үзсэнээс "A Tale of Two Sisters" гээд сэтгэлзүйн аймшгийн кино, гэмт хэрэг, триллер төрлөөр "Bittersweet life", "I saw the devil" гээд нийт гурван кино байна. 

Эхний "Эгч дүүсийн түүх" нэртэй кино нь шүүмжлэгч, үзэгчдийн аль алинаас сайн үнэлгээ авч, багагүй нэр хүнд олж цаашлаад 2009 онд холливүүд өөрсдийн хувилбараар "The uninvited" нэрээр дахин хийсэн байна лээ. Сэтгэлзүйн аймшиг дотроо зохиол, хийц сайтай киноны тоонд зүй ёсоор тооцогдох байх.

"Bittersweet life" нь харин тун дажгүй кино. Гэмт хэрэг, эмгэнэлт төрөлд багтах юм уу даа. Эцсийн мөчид гол дүрийн өмнөөс харамсаж, халагламаар байдалд үзэгчийг оруулдаг, нэг тиймэрхүү.

Ким Жэ-Вун найруулагчийн хамгийн хүчтэй бүтээл нь "Би биелсэн чөтгөр харсан" хэмээх триллер төрлийн кино юм. "Хуучин хүү" шиг өгүүлэмжийн гүн ээдрээ бага ч яах аргагүй хүчтэй бүтээл. Дашрамд дурьдахад "Хуучин хүү", "Галт зурлага" (The painted fire) зэрэг кинонд бүтээсэн бишрэм дүрүүдээр нь бидний сайн мэдэх солонгосын жүжигчин Чой Мин Сик (Choi Min-sik) нэг хэсэг солонгосын кино дэлгэцийн квотын системд (Гадаадын кино үйлдвэрлэлээс дотоодын зах зээлийг хамгаалах зорилгоор 1 жилд кинотеатруудад гарах дотоодын киноны эзлэх доод хувийг дэлгэцэнд гарсан цагаар хэмжин хуульчлан зааж өгөх төрийн бодлого) гарсан өөрчлөлтийг эсэргүүцэж кинонд тоглохоос татгалзаж байгаад эцэстээ уг киноны цуврал алуурчны дүрд тоглохоор зөвшөөрсөн ажээ. Үйл явдлын гол зангилаа нь энэ улсын триллер төрлийн киноны "сонгодог" сэдэв болох өш хонзон.

Нэгэн цастай үдэш 30 орчим насны цэвэрхэн, энгийн төрхтэй эмэгтэй машин барьж яваагаар кино эхлэнэ. Удалгүй эмэгтэй нөхөр лүүгээ залгаж, өнөөдөр оройтохгүй ирнэ гэж амласныг нь сануулах авч нөхөр нь мөрдөгч бололтой хэргийн газарт мөрдлөг хийгээд завгүй, удахгүй очно гэж аргалаад утсаа тасалдаг. Тэгж байтал замын хажууханд аваарын гэрлээ асааж машинаа зогсоосон, нэлээд сандарч тэвдсэн төрхтэй дундаж насны эрэгтэй гар өргөн зогсохыг өнөө эмэгтэй хараад туслах санаатай машинаа зогсоож яасныг нь лавлаж асууна. Гэтэл өнөөх нь машиныхаа багаажнаас лоом гаргаж ирээд яах ийхийн зуургүй өнөө эмэгтэйн машины цонхыг хагалж машинаас чирч гаргаад аваад явчихна. За тэгээд өнөөх эмэгтэйг том зооринд аваачаад "би жирэмсэн, намайг битгий алаач" гээд гуйгаад байхад нь хэнэг ч үгүй хэрцгийгээр хороож орхидог.  Удалгүй мөрдөн байцаагч нөхөр нь эхнэрээ аймшигтайгаар тамлагдан алагдсаныг олж эхнэрийнхээ өш хонзонг авахаар албан тушаалаасаа ашиглаж хувийн мөрдлөг хийж, алуурчны араас улангасан мөшгиж эхэлдэг. Эцэстээ эхнэрийг нь алсан алуурчныг олох агаад кино төгсөхөд хүйтэн цуст цуврал алуурчин, өшөө хорсолдоо шатсан мөрдөгч хоёрын хэн нь чухам биелсэн чөтгөр байв аа хэмээх асуултыг үзэгч өөрөөсөө асуух биз. Кино эхлэхэд "чөтгөр" нь гарцаа байхгүй хэрцгий алуурчин байх авч кино төгсөх хүртэлх үйл явцад хорсолдоо зангирсан нөхөр өнөөх алуурчнаас ч үл ялгагдам харгислалыг үйлддэг нь үзэгчдийг асуулт, эргэлзээнд оруулах гол сэдэл нь болно. Хамгийн гол нь нөхөр хүйтэн цуст алуурчин эхнэрийг нь алж байхад бусдын тарьсан гэмт хэргийг мөрдөөд туйлын завгүй явсан, үргэлж л ажилтай гээд эхнэрээ хайхрадаггүй байдал нь эцэстээ ийм үр дүнд хүргэсэн мэт санагдан өөрийгөө буруутгах сэтгэл өш хонзонг нь улам дэврээж, хурцалсан болов уу. Киног эргэцүүлэх явцдаа эцэстээ хүний мөн чанарын тухай бодол руу орж байгаа юм. Хэрцгийллийг хэрцгийллээр, мууг муугаар хариулах ёстой юу? Хэрэв тэгвэл үзэн ядаж, өшиж хорсоод байсан өнөөх муу муухай, хэрцгийгээсээ ялгаагүй болдог юм биш биз? Хүний дотор ер нь нөхцөл байдал бүрэлдэх л юм бол гарахаа хүлээгээд бурхан, чөтгөр хоёр зэрэгцээд сууж байдаг юм биш биз дээ? Тийм байж магадгүй гэсэн хариултанд тулж очоод байгаа юм. Зарим хүн бурханлиг талаа, зарим хүн чөтгөрөө ил гаргадаг. Ихэнх нь нөхцөл байдлын боолчлолд л байдаг, тун цөөхөн хүн нөхцөл байдлаа давж гардаг. Тийм болохоор л яг адилхан хоёр орчинд өссөн хүүхдийн нэг нь цуврал алуурчин, нөгөө нь эмч болдог. Нөхцөл байдлаас гадна хүний суурь өгөгдөл, төрөлх авир гээд олон зүйлийг нөлөөлөх хүчин зүйлд тооцож болох биз. Энэ бүгд шүтэн барилдаад л сайн, муу хүмүүсийг төрүүлнэ. Кинон дээрх эхнэрээ алуулсан нөхрийн хувьд өөрийгөө буруутгах гэм буруу улангасал, хэрцгийллийнх нь гол шалтгаан байсан, цаашлах тусам үйлдэлдээ улам ороогдсоор эцэстээ хязгаараа давж, хүн төрхөө гээж "чөтгөр" шиг болох замаар өөрийгөө ч шийтгэж, эхнэрийг нь алсан хүнийг ч цээрлүүлж байна. Хүнд кино, дээрээс нь яргалал, тамлалын элементүүдийг туйлын бодитой үзүүлснийг ч хэлэх үү. 

*    *    *

Chaser (2009)

Энэ чиглэлээр сонирхож үздэг хүмүүс үзэхэд хэзээ ч харамсхааргүй кино. Яргалал, хүчирхийллээс илүүтэй аазгай хөдөлгөж, бачимдуулсан үйл явдлаар үзэгчдээ татах кино гэж болно. Хуучин мөрдөгч байсан эр амьдралын эрхээр биеэ үнэлэгчдийн жуучлагч, босс болж хувирчээ. Нэгэн шөнө утсаар захиалга ирэхэд ханиад хүрээд бие нь тааруухан байгаа ажилтнаа шахсаар байгаад ажилд нь гаргуулдаг. Гэтэл үйлчлүүлэгч нь эмэгтэйчүүдийн тархийг цүүцээр хага цохиж алдаг гаж донтой цуврал алуурчин байх нь тэр. Хуучин мөрдөгч байсан туршлагатай, тэгээд ч хүн чанараа бүр мөсөн гээчихээгүй босс шахсаар байгаад явуулсан ажилтан нь ор сураггүй болчихоор араас нь мөрдөж хайсаар байгаад алуурчныг олох боловч...